काठमाडौं । सरकारले घोषणा गरेको लकडाउन अवधिमा सवारी साधनको बीमा शुल्कमा दुई तिहाई छुट हुने भएको छ ।
बीमा समितिले सबै निर्जीवन बीमा कम्पनीहरुलाई चैत ११ गतेदेखि लकडाउन खुला हुने अवधिसम्म सवारीसाधनको बीमा शुल्कमा २ तिहाई छुट दिन निर्देशन दिएको हो । बाँकी एक तिहाई रकम भने थन्किएको अवस्थामा हुनसक्ने जोखिमका लागि कायमै राख्ने निर्णय समेत बीमा समितिले गरेको छ ।
बीमा समितिले मोटर बीमासम्बन्धी निर्देशिकाको व्याख्या गर्दै सो अवधिमा बीमा शुल्क छुन दिने व्यवस्था गरेको हो । तर, लकडाउनको अवधिमा अत्यावश्यक सेवाका लागि पास लिएका सवारी साधनको हकमा पास नपाएर थन्किएको अवधिमा लागि मात्रै त्यस्तो छुट लागु हुने समेत सकितिले जनाएको छ । तर त्यसरी छुट दिँदा नबीकरणबापत लाग्ने शुल्कमा छुट दिनु भने नपर्ने जनाइएको छ ।
यस्तो छुट यात्रु बीमा, कर्मचारी बीमा र तेस्रो पक्ष बीमाको हकमा समेत लागु हुने समितिले जनाएको छ । त्यस्तो छुट नवीकरण गर्दाको समयमा बीमितले प्राप्त गर्नेछ । यदि अर्को बीमकबाट नवीकरण गराउने हो भने त्यस्तो बीमितलाई बीमकले छुट रकमको प्रमाणपत्र उपलब्ध गराउनुपर्ने समेत समितिको निर्देशनमा उल्लेख छ ।
