भक्तपुर। भक्तपुरको खरिपाटीस्थित नेपाल विद्युत् प्राधिकरण तालिम केन्द्रको कोरोना भाइरस (कोभिड–१९) क्वारेन्टाइनमा रहेका ९६ जनामध्ये ७३ जनालाई आज घर पठाइएको छ ।
विभिन्न मुलुकबाट १७ दिन अघि नेपाल फर्किएका उनीहरुको स्वाब परीक्षणमा कोरोना भाइरसको रिपोट नेगेटिभ आएपछि आज घर पठाइएको हो । उनीहरु चैत ८ र ९ गते थाई एयरवेज, एयर इण्डिया, सिल्क एयर लगायतका विमानहरुबाट ७३ जना तथा चैत १२ गते भारतको स्थल मार्गबाट आएका २३ जना गरी जम्मा ९६ जनालाई खरिपाटी क्वारेन्टाइनमा राखिएको थियो ।
गत शुक्रबार ९६ जनाको स्वाब परीक्षणका लागि टेकुस्थित जनस्वास्थ्य प्रयोगशालामा लगिएको थियो भने ९४ जनाको रिपोर्ट आइतबार आएको थियो । बाँकी दुई जनाको स्वाब पुनः परीक्षणका लागि प्रयोगशालले आज लिन आएको महानगरीय प्रहरी परिसर भक्तपुरका प्रमुख प्रहरी उपरीक्षक सबिन प्रधानले जानकारी दिनुभयो ।
घर जान बाँकी २३ जनालाई भने दुई जनाको रिपोर्ट आएपछि मात्र पठाइने बीरदल गणका कर्णेल शिव पौडेलले जानकारी दिनु भयो । क्वारेन्टाइन भित्रको सम्पूर्ण ब्यवस्थापन बिरदल गण सूर्यविनायक भक्तपुरले हेर्ने गरेको गणका प्रमुख सेनानी शिवप्रसाद पौडेलले जानकारी दिनुभयो । आज पठाइएकाहरु मध्ये उपत्यकाबाहेक अन्य ठाउँका लागि बसको भाडा स्वयम् आफैले तिर्ने गरि चार वटा रुट बनाएर घरसम्म पु¥याउन बसको व्यवस्थापन गरेको छ ।
उपत्यकाबाहिरका लागि काठमाडौं–झापा, काठमाडौं–पोखरा र काठमाडौं–नेपालगञ्जका लागि बसको व्यवस्था गरेको हो भने भक्तपुर देखि बनेपा–पाँचखालसम्मका लागि ट्याक्सीको व्यवस्था मिलाई दिएको महानगरीय प्रहरी परिसर भक्तपुरका प्रमुख प्रहरी उपरीक्षक सबिन प्रधानले जनाएको छ ।
उपत्यका भित्रका लागि नेपाली सेनाको बस तथा उपत्यका बाहिर जानेहरुका लागि नेपाली सेनाले खाजाको समेत व्यवस्था गरेको छ । क्वारेन्टाइनमा बसेकाहरुको खाना खर्च नेपाल सरकारले व्यहोर्ने भएको छ ।
